کٹھ پتلی وزیر اعظم پاکستان کی بجائے شریف خاندان کے مفادات کی جنگ لڑ رہے ہیں :عبدالعلیم خان

کٹھ پتلی وزیر اعظم پاکستان کی بجائے شریف خاندان کے مفادات کی جنگ لڑ رہے ہیں

لاہور :  پاکستان تحریک انصاف سنٹرل پنجاب کے صدر عبدالعلیم خان نے کہا ہے کہ نا اہلوں کے نامزد کردہ کٹھ پتلی وزیر اعظم پاکستان کے بجائے شریف خاندان کے مفادات کی جنگ لڑرہے ہیں، نواز شریف کی سیاست دم توڑ چکی ہے ،

شاہد خاقان عباسی کے تقریری نسخے کسی کام نہیں آسکتے اور نااہلوں کی وکالت کرنے کے بجائے ایل این جی سمیت اپنی کرپشن کا حساب دینے کی تیاری کریں عبدالعلیم خان نے چئیرمین سیکرٹریٹ میں مختلف اضلاع کے پارٹی رہنماؤں سے گفتگو کرتے ہوئے کہا کہ کٹھ پتلی وزیر اعظم کی طرف سے نااہل نواز شریف کو اپنا وزیر اعظم قرار دینا عدلیہ کیخلاف اعلان بغاوت ہے، شاہد خاقان عباسی ملکی مفادات کیلئے کام کرنے کی بجائے خود کو آئین اور قانون سے بالاتر سمجھنے والے کرپٹ ٹولے کے ترجمان نظر آرہے ہیں، اپنے بڑوں کی طرح احتساب فوبیا کا شکار وزیر اعظم کا اپنا دامن بھی کرپشن سے آلودہ اور انہیں اپنے منطقی انجام کی فکر کھائے جارہی ہے۔

عبدالعلیم خان نے کہا کہ معیشت کو تباہ اور ملک کو قرضوں کے انبار تلے دبانے والی نواز لیگ کے وکرز کنونشن میں بڑی ڈھٹائی سے کوئی شرمندگی نہ ہونے کا دعوی کرنے والے آئندہ انتخابات میں منہ چھپاتے پھریں گے، مہنگائی، بیروزگاری اور مسائل کے مارے لوگ اپنے ووٹ کے ذریعے ان سے انتقام لینگے۔

انہوں نے کہا کہ شریفوں کی رخصتی کا پروانہ لکھا جاچکا ہے،کرپشن کیسز کے فیصلہ کن راؤنڈ میں بچ جانے والوں کو ماڈل ٹاؤن میں قتل عام پر جیلوں میں جانا پڑے گا، عبدالعلیم خان نے کہا کہ نوشتہ دیوار پڑھتے ہوئے حواریوں اور درباریوں نے ابھی سے لوٹ مار کا مال ٹھکانے لگا کر بھاگ نکلنے کی تیاریاں شروع کردیں لیکن پی ٹی آئی کرپٹ مافیا کا پیچھا نہیں چھوڑے گی اور ان کو منطقی انجام تک پہنچانے اور لوٹی گئی دولت ملک میں واپس لانے تک جدوجہد جاری رہے گی، .

Spread the love

Comments

comments

اپنا تبصرہ بھیجیں