عید کا تعلق صرف پاکستان سے نہیں ہے، گلوکار عدنان سمیع

عدنان سمیع خان

بھارت میں مسلمانوں کی تعداد پاکستان سے زیادہ ہے، عید کو پاکستان بھارت کا مسئلہ نہ بنائیں، گلو کار

بھارتی گلوکار و موسیقار عدنان سمیع خان نے ایک پاکستانی مداح کے نام اپنے پیغام میں کہا ہے کہ عید کا تعلق تمام مسلمانوں سے ہے، براہ مہربانی اسے پاکستان بھارت کا موضوع نہ بنائیں۔واضح رہے کہ ہندوؤں کے مذہبی تہوار اگادی کے موقع پر عدنان سمیع خان نے سوشل میڈیا پر اپنے مداحوں کے لیے مبارکباد کا پیغام پوسٹ کیا تھا۔

اگادی تیلگو زبان بولنے والوں کیلئے سال نو کے آغاز کا تہوار ہے جو بھارتی ریاست آندھرا پردیش میں بڑی دھوم دھام سے منایا جاتا ہے۔عدنان سمیع کی جانب سے اگادی کی مبارکباد دینے پر ایک پاکستانی نے ٹوئٹر پر لکھا کہ امید ہے آپ عید کے موقع پر ہمیں بھی یاد رکھیں گے۔

مذکورہ پاکستانی مداح نے اپنے ٹوئٹر پیغام میں عدنان سمیع کے مشہور زمانہ گانے ہم بھی تو ہیں تمہارے ٗدیوانے ہو دیوانے ٗ کے بول کے ساتھ لکھا لوفرام پاکستان۔جس کے جواب میں عدنان سمیع نے لکھا کہ عید کا تعلق صرف آپ سے نہیں پوری مسلم امہ سے ہے ٗ اسے پاکستان بھارت کا موضوع بنانے سے گریز کریں۔

عدنان سمیع کا کہنا تھا کہ بھارت میں مسلمانوں کی تعداد پاکستان سے زیادہ ہے۔عدنان سمیع نے اپنے پیغام کے آخر میں اپنے گانے کے بول کبھی تو نظر ملاؤ ٗ کبھی تو قریب آؤ بھی لکھے۔

واضح رہے کہ گزشتہ ایک دہائی سے ممبئی میں مقیم عدنان سمیع کو یکم جنوری 2016 کو ہندوستانی شہریت دی گئی تھی۔ پاکستان کے شہر لاہور سے تعلق رکھنے والے عدنان سمیع پہلی بار 13 مارچ 2001 کو ایک سال کے وزٹ ویزہ پر بھارت گئے تھے، جس کے بعد ان کے ویزا میں کئی بار توسیع کی جاتی رہی بعدازاں انھوں نے بھارت میں اپنے قیام کو انسانی ہمدردی کی بنیاد پر قانونی قرار دینے کی درخواست کی، جس پر انہیں غیر معینہ مدت تک بھارت میں قیام کی اجازت دے دی گئی تھی۔

Spread the love

Comments

comments

اپنا تبصرہ بھیجیں