آسٹریلیا کو شکست، ٹی ٹوئنٹی سیریز پاکستان کے نام

ٹی ٹوئنٹی سیریز

پاکستان نے آسٹریلیا کو تیسرے اور آخری ٹی 20 میچ میں 33 رنز سے شکست دے کر سیریز 0-3 سے جیت لی۔

دبئی انٹرنیشنل کرکٹ اسٹیڈیم  پر کھیلے گئے میچ میں پاکستان نے پہلے بیٹنگ کرتے ہوئے مقررہ 20 اوورز میں 150 رنز بنائے اور آسٹریلیا کو جیت کے لیے 151 رنز کا ہدف مقرر کیا۔

ہدف کے تعاقب میں آسٹریلیا کی پوری ٹیم117 رنز پر ڈھیر ہوگئی اور پاکستان نے میچ 33 رنز سے جیت کر مہمان ٹیم کو وائٹ واش کر دیا۔ یوں سرفراز احمد کی قیادت میں گرین شرٹس نے لگاتار دسویں سیریز اپنے نام کرلی، شاداب مین آف دی میچ جبکہ بابر اعظم مین آف دی سیریز قرار پائے۔

پہلی اننگز میں گرین شرٹس کی طرف سے نمایاں اسکورز میں بابر اعظم 50، صاحبزادہ فرحان 39 رنز پر آؤٹ اور محمد حفیظ 32 رنز کے ساتھ ناقابل شکست شامل تھے۔

آسٹریلیا کی طرف سے کپتان ایرون فنچ اور ایلکس کری نے اننگز کا آغاز کیا اور پہلے ہی اوور میں ایلکس کری نے عماد وسیم کو 2 چھکے اور اتنے ہی چوکے مارکر 20رنز بٹور لئے۔

دوسرے اوور کی پانچویں گیند پر 24 کے مجموعی اسکور پر فہیم اشرف نے آسٹریلوی کپتان ایرون فنچ کو محمد حفیظ کی مدد سے قابو کرلیا،وہ 1 رن بنا کر پویلین لوٹ گئے۔

24 ہی کے اسکور پر آسٹریلیا کو دوسرا نقصان اٹھانا پڑا،جارحانہ انداز میں کھیل رہے، ایلکس کری کو اس بار محمد حفیظ نے فہیم اشرف کی مدد سے پویلین کا راستہ دکھایا۔

آسٹریلیا کی تیسری وکٹ آٹھویں اوور کی پہلی گیند پر گری، 60 کے مجموعے پر 2 چوکوں کی مدد سے  15 رنز بنانے والے کرس لیان کو شاداب خان نے میدان سے واپس بھیجا۔

یلو شرٹس کے چوتھے آئوٹ ہونے والے بیٹسمین بین میک ڈورمیٹ تھے، جو 21 کے انفرادی اسکور پر رن آؤٹ ہوئے، یوں 62 کے اسکور پر آسٹریلیا کے 4 بیٹسمین میدان چھوڑ چکے تھے۔

گزشتہ میچ کے نصف سنچری بناکر میچ میں جان ڈالنے والے میکس ویل آج صرف 4 رنز بناسکے، انہیں شاداب خان نے شعیب ملک کی مدد سے قابو کیا، یوں 75 کے مجموعے تک آسٹریلیا کی آدھی ٹیم پویلین لوٹ چکی تھی۔

آسٹریلیا کی چھٹی وکٹ مچل مارش کی گری، جو 21 رنز بناکر شاداب خان کا تیسرا شکار بن گئے، ان کا کیچ شعیب ملک نے لیا۔

مہمان ٹیم کی ساتویں وکٹ 99 ہی کے مجموعے پر گرگئی، ڈی آرسی شارٹ 10 رنز بناکر آؤٹ ہوگئے،شعیب ملک نے میچ میں پہلی وکٹ لینے میں عثمان شنواری کی مدد کی۔

آسٹریلیا کے آٹھویں آئوٹ ہونے والے بیٹسمین ناتھین نائیل تھے وہ بغیر کوئی رنز بنائے رن آئوٹ ہوگئے۔ یلو شرٹس کی نویں وکٹ 108 کے اسکور پر گر گئی،حسن علی نے اینڈریو ٹائی کو آؤٹ کیا۔

آسٹریلیا کی آخری وکٹ 117 کے اسکور پر گری، حسن علی نے زیمپا کو عماد وسیم کی مدد سے قابو کرلیا۔

پاکستان کی طرف سے شاداب خان نے 19 رنز کے عوض 3، حسن علی نے 14 رنز دے کر 2 جبکہ فہیم اشرف، محمد حفیظ اور عثمان شنواری نے 1،1 وکٹ اپنے نام کی۔

Spread the love
  • 1
    Share

Comments

comments

اپنا تبصرہ بھیجیں