غزہ پر اسرائیلی جنگی طیاروں کی بمباری، تین فلسطینی شہید

فلسطین

یروشلم: فلسطین کے مقبوضہ شہر غزہ میں اسرائیلی جنگی طیاروں کی شدید بمباری کے نتیجے میں تین فلسطینی نوجوان شہید جبکہ متعدد زخمی ہوگئے۔

تفصیلات کے مطابق غاصب صیہونی ریاست اسرائیل کی انتہا پسند افواج کے جنگی طیاروں کی جانب سے گذشتہ روز فلسطین کے شہر مقبوضہ غزہ کے علاقے خان یونس میں بمباری کی گئی جس کے نتیجے میں تین فلسطینی شہری شہید جبکہ متعدد زخمی ہوگئے۔

فلسطینی خبر رساں ادارے کا کہنا تھا کہ اسرائیل کے درندہ صفت فوجیوں کی جانب سے غزہ اور اسرائیل کی سرحد پر موجود شہریوں کو بمباری کا نشانہ بنایا گیا تھا۔

مقامی میڈیا کا کہنا ہے کہ اسرائیلی جنگی طیاروں کی شدید بمباری میں شہید ہونے والے دو فلسطینی نوجوانوں کی عمریں 13 اور 14 برس بتائی جارہی ہے جبکہ تیسرے شہید کی شناخت تاحال نہیں ہوسکی ہے۔

دوسری جانب صیہونی ریاست اسرائیل کی فورسز کے ترجمان کا کہنا ہے کہ جنگی طیاروں کے ذریعے ان فلسطینیوں کو بمباری کا نشانہ بنایا گیا ہے جو غزہ اور اسرائیل کی سرحدی باڑ کو دھماکے سے اڑانے کی کوشش کر رہے تھے۔

یاد رہے کہ فلسطین میں قابض اسرائیلی فوج کی فائرنگ سے زخمی ہونے والا فلسطینی نوجوان گذشتہ روز دوران علاج دم توڑ گیا تھا۔

مقامی خبر رساں ادارے کا کہنا تھا کہ جمعے کے روز ہزاروں فلسطینی اسرائیلی قبضے کے خلاف ہفتہ وار مظاہرہ کررہے تھے کہ اسی دوران اسرائیلی فوج کی فائرنگ سے ایک فلسطینی نوجوان ’ یحیٰ بدر‘ زخمی ہوگیا تھا۔

غیر ملکی خبر رساں ادارے کے مطابق زخمی نوجوان کا مقامی اسپتال میں علاج جاری تھا تاہم آج زخموں کی تاب نہ لاتے ہوئے شہید ہوگیا۔

Spread the love

Comments

comments

اپنا تبصرہ بھیجیں