حکومت کی 100 روزہ کارکردگی پر جناح کنونشن سینٹر میں تقریب

وزیر اعظم

اسلام آباد: وزیراعظم عمران خان کچھ دیر بعد قوم کو اپنی حکومت کے 100 روزہ پلان پر عملدرآمد کے نتائج اور کارکردگی کے حوالے سے اعتماد میں لیں گے۔

اسلام آباد کے جناح کنونشن سینٹر میں تقریب جاری ہے جس میں وفاقی وزراء سمیت حکومتی اور دیگر شخصیات کی بڑی تعداد موجود ہے۔

واضح رہے کہ پاکستان تحریک انصاف (پی ٹی آئی) کی حکومت کے قیام کے 100 روز پورے ہوگئے ہیں اور وفاقی وزارتوں، ڈویژنز اور وزراء نے اپنے اداروں اور محکموں کی رپورٹس وزیراعظم کو پیش کردیں جس پر انہوں نے اعتماد کا اظہار کیا ہے۔

وزیراعظم اپنے خطاب کے دوران قوم کو سادگی و کفایت شعاری مہم، نیا پاکستان ہاؤسنگ منصوبے،گورننس، معاشی بہتری اور عام آدمی کے مسائل کے حل کے لیے کیے گئے حکومتی اقدامات سے آگاہ کریں گے۔

وزیراعظم مختلف ٹاسک فورسز کی کارکردگی پر بھی بات کریں گے۔

ذرائع کے مطابق وزیراعظم صوبوں کے درمیان ہم آہنگی اور خارجہ پالیسی میں بہتری کے اقدامات سے بھی قوم کو آگاہ کریں گے۔ دوسری جانب وزیراعظم پاک بھارت تعلقات میں بہتری کی کوششوں اور کرتارپور راہداری کھولنے کا بھی ذکر کریں گے۔

ذرائع کے مطابق وزیر اعظم کا کہنا ہے کہ تحریک انصاف کی حکومت نے ملک کی ترقی کی سمت کا تعین کردیا ہے اور عوام کو بنیادی سہولیات کی فراہمی اور معیار زندگی بلند کرنے کے منصوبے شروع کیے گئے ہیں جن کی بروقت تکمیل یقینی بنائی جائے گی۔

Spread the love

Comments

comments

اپنا تبصرہ بھیجیں