نوجوت سنگھ سدھو نے وزارت سے استعفیٰ دے دیا

نوجوت سنگھ

چندی گڑھ: ہندوستانی پنجاب کابینہ کے رکن نوجوت سنگھ سدھو نے وزیراعلیٰ سے اختلافات کی بنیاد پر کابینہ سے استعفیٰ دے دیا ہے۔

نوجوت سنگھ سدھو نے سماجی رابطے کی ویب سائٹ ٹویٹر پر مستعفی ہونے کا اعلان کیا، انہوں نے انڈین نیشنل کانگریس کے صدر راہول گاندھی کے نام استعفیٰ لکھا جس میں انہوں نے کہا کہ وہ پنجاب کابینہ میں وزیر کے عہدے سے مستعفی ہو رہے ہیں۔

نوجوت سنگھ سدھو نے کابینہ سے اپنے استعفے کی وجہ بیان نہیں کی تاہم بھارتی میڈیا کے مطابق ان کے وزیراعلیٰ پنجاب امارندر سنگھ سے اختلافات تھے۔

واضح رہے کہ نوجوت سنگھ سدھو اور وزیراعلیٰ پنجاب امارندر سنگھ کے درمیان اختلافات اس وقت شدت اختیار کرگئے تھے جب لوک سبھا کے انتخابات میں نوجوت سنگھ سدھو کی اہلیہ کو ٹکٹ نہیں دیا گیا تھا۔

نوجوت سنگھ سدھو گزشتہ ماہ بھی وزارت سے دستبردار ہوگئے تھے تاہم راہول گاندھی سے ملاقات کے بعد معاملات طے پاگئے تھے جس کے بعد سدھو کو وزارت توانائی دی گئی تھی تاہم انہوں نے اپنی ذمہ داریاں نہیں سنبھالی تھیں۔

یاد رہے کہ کرتارپور راہداری کے سنگ بنیاد کی تقریب میں سدھو نے پاکستان کا دورہ کیا تھا، راہداری کھولنے پر سدھو نے پاکستان کی تعریف کرتے ہوئے اسے پوری دنیا کی سکھ برادری کے لیے اچھی خبر قرار دیا تھا۔

پاکستان کے حق میں بیانات دینے کے بعد نوجوت سنگھ سدھو کو بھارتی کامیڈی پروگرام کپل شرما شو سے بھی نکال دیا گیا تھا۔

loading...

Comments

comments

اپنا تبصرہ بھیجیں