وفاقی وزیر داخلہ سے چیئرمین پاکستان کرکٹ بورڈ نجم سیٹھی کی ملاقات

اسلام آباد : وفاقی وزیر داخلہ پروفیسر احسن اقبال نے کہا ہے کہ پاکستان میں انٹرنیشنل کرکٹ کی بحالی خوش آئند ہے ،پاکستان آنیوالی ٹیموں کو فول پروف سیکورٹی دی جائیگی ،دہشت گردوں اور انتشار پھیلانے والے عناصر کی کمر ٹوٹ چکی ہے۔ بین الاقوامی ٹیموں کے دورہ اور میچز کے انعقاد سے دنیا میں پاکستان کا مثبت تصور جائیگا۔ وفاقی وزیر داخلہ نے یہ بات چیئرمین پاکستان کرکٹ بورڈ نجم سیٹھی سے گفتگو کرتے ہوئے کہیں جنہوں نے ان سے منگل کو ملاقات کی۔ ملاقات میں پاکستان میں انٹرنیشنل کرکٹ کی بحالی اور دورہ کرنے والے بین لاقوامی کھلاڑیوں کی حفاظت کیلئے سیکورٹی انتظامات پر تبادلہ خیال کیا گیا۔ اس موقع پر گفتگو کرتے ہوئے وفاقی وزیر داخلہ نے کہا کہ پاکستان میں انٹرنیشنل کرکٹ کی بحالی خوش آئند ہے پاکستان آنے والی ٹیموں کو فول پروف سیکورٹی دی جائیگی۔ وزیر داخلہ نے کہا کہ دہشت گردوں اور انتشار پھیلانے والے عناصر کی کمر ٹوٹ چکی ہے۔ انہوں نے کہا کہ ملک میں امن و امان کی صورت حال کھیلوں کے انعقاد کے حوالے سے موزوں ہے، حکومت کھیلوں کی پذیرائی کیلئے سرگرداں ہے ۔وزیر داخلہ نے کہا کہ بین الاقوامی کھلاڑیوں کو تحفظ دینا حکومت کی اولین ترجیح ہے۔ انہوں نے کہا کہ کھلاڑیوں کی حفاظت کیلئے منظم اور مربوط حکمت عملی مرتب کی جائیگی ۔انہوں نے کہا کہ بین الاقوامی ٹیموں کے دورہ اور میچز کے انعقاد سے دنیا میں پاکستان کا مثبت تصور جائیگا۔ وزیر داخلہ سے ملاقات کے بعد چیئر مین پی سی بی نجم سیٹھی نے این این آئی سے بات چیت کرتے ہوئے کہا کہ پاکستان میں انٹرنیشنل کرکٹ کی بحالی کے لئے مثبت جواب مل رہا ہے پاکستان آنے والی ٹیموں کو فول پروف سیکورٹی فراہم کی جائے گی اس حوالے سے وزیر داخلہ سے تفصیلی بات ہوئی ہے ۔