فلم ’’ شور شرابا ‘‘ میں سرمایہ کاری نہیں کی، افواہوں پر توجہ نہیں دیتی ‘ رابی پیرزادہ

پائلٹ بننے کا عزم کیا تھا مگر قسمت شوبز میں لے آئی، والدہ میری بہترین دوست ہیں ‘ خصوصی گفتگو
لاہور ( این این آئی) گلوکارہ و اداکارہ رابی پیرزادہ نے کہا ہے کہ فلم ’’ شور شرابا ‘‘ میں سرمایہ کاری نہیں کی ،افواہوں پر توجہ نہیں دیتی ، سچے اور کھرے لوگ اچھے لگتے ہیں ، خوشامد اور منافقت کرنے والے لوگوں سے دور رہتی ہوں۔ انہوں نے خصوصی گفتگو کرتے ہوئے کہا کہ میری والدہ سب سے بہترین دوست ہیں ، چاند پر جانے کی خواہش ہے مگر پتہ نہیں یہ خواہش کب پوری ہو گی، بچپن سے چاند کی چاندنی دیکھ کر خواہش مچلتی تھی کہ میں چاند پر جا کر دیکھوں کہ وہاں واقعی کوئی اماں چرخاں کات رہی ہے اور میرے ساتھ ساتھ یہ خواہش بھی جوان ہوتی گئی ، پائلٹ بننے کا عزم کیا تھا مگر قسمت مجھے شوبز کی طرف لے آئی ۔ انہوں نے ایک سوال کے جواب میں اس بات کی نفی کی کہ میں نے سہیل خان پروڈکشن کی فلم ’’ شور شرابا ‘‘ میں سرمایہ کاری کی ہے ۔ انہوں نے کہا کہ اگر اسی طرح ہر لڑکی فلموں میں پیسے لگانا شروع کر دے تو اس وقت انڈسٹری میں ہزاروں لڑکیاں ہیروئن ہونی چاہئیں۔ انہوں نے کہا کہ بعض لوگوں کو میری شہرت ہضم نہیں ہوتی اور وہ اس طرح کی افواہیں پھیلاتے رہتے ہیں جس پر میں توجہ نہیں دیتی اور میں ایسے لوگوں کے لئے دعا ہی کر سکتی ہوں کہ خدا ان کو نیکی کی ہدایت دے ۔ انہوں نے کہا کہ مجھے آزاد کشمیر کا شہر مظفر آباد بہت پسند ہے اور سیرو تفریح کے لئے پیرس میری پسندیدہ جگہ ہے ۔