مغرور نواز لیگ مفرور پارٹی بن چکی-عبدالعلیم خان

مغرور نواز لیگ مفرور پارٹی بن چکی ، اسحاق ڈار کو انٹر پول کے ذریعے واپس لایا جائے:عبدالعلیم خان
اقتصادی حالت خطرے کی گھنٹی بجا رہی ہے،ملک دیوالیہ ہوا تو ذمہ داری شریف خاندان پر ہو گی :گفتگو
عبدالعلیم خان سے میاں افضل حیات ، مہر فیاض ،ملک عثمان اور مدد علی شاہ کی ملاقاتیں و مشاورت
لاہور۔13دسمبر :۔( ) پاکستان تحریک انصاف سنٹرل پنجاب کے صدر عبدالعلیم خان نے کہا ہے کہ مغرور نواز لیگ مفرور پارٹی میں بدلتی جارہی ہے، قوم کو مقروض بناکر لندن بھاگ جانے والے اسحاق ڈار کو انٹرپول کے ذریعے واپس لایا جائے، برطانوی شہریت کے پیچھے چھپنے والے شریف خاندان کے سپوتوں کو بھی کٹہرے میں کھڑا کرنا ہوگا، چوروں اور لٹیروں کا کھلا چھوڑ دیا گیا تو احتساب کا عمل ادھورا رہ جائے گا عبدالعلیم خان نے چئیرمین سیکرٹریٹ میں مختلف اضلاع کے پارٹی رہنماؤں سے گفتگو کرتے ہوئے کہا کہ اقتصادی حالت خطرے کی گھنٹی بجا رہی ہے اگر ملک دیوالیہ ہوا تو ذمہ داری شریف خاندان پر عائد ہو گی کیونکہ شریف خاندان اور درباریوں نے ہر دور اقتدار میں عوام کے حقوق پر ڈاکے ڈالتے ہوئے اپنی تجوریاں بھری ہیں،سستی روٹی، میٹروبس سے لیکر اورنج ٹرین تک ہر منصوبہ کمیشن خوری کیلئے بنایا گیا، عبدالعلیم خان نے کہا کہ عوام کو بنیادی سہولیات فراہم کرنے کی بجائے کرپشن کے نت نئے طریقے ایجاد کئے گئے، اسحاق ڈار کی ہر معاشی پالیسی نے کرپٹ مافیا کیلئے سہولت کار کا کردار ادا کرتے ہوئے عام آدمی کو مہنگائی اور بیروزگاری کے تحفے دیئے، انہوں نے کہا کہ راہ فرار اختیار کرنے والے اس قومی مجرم کی خودساختہ بیماری کا پول کھل چکا، فوری طور پر ملک میں واپس لاکر پائی پائی کا حساب لیا جائے۔ عبدالعلیم خان نے کہا کہ سرکاری وسائل کا بے دریغ استعمال کرتے ہوئے اپنی نجی ہاؤسنگ سکیموں کیلئے ترقیاتی کام کروانے والے سعد رفیق کس منہ سے شفافیت کے دعوے کرتے ہوئے اپنا گلا خشک کرتے ہیں،نواز شریف کو مظلوم ثابت کرنے کیلئے جھوٹے پراپیگنڈا کی مہم سے فرصت ملے تو کبھی اپنے گریبان میں جھانک لیں۔انہوں نے کہا کہ ہر روز نیا سورج طلوع ہونے کیساتھ کرپٹ ٹبراور درباریوں کی لوٹ مار کے نئے انکشافات سامنے آرہے ہیں،صرف ان سے ہی لوٹی گئی دولت واپس چھین لی جائے تو ملک کو قرضوں کے بوجھ سے نجات مل سکتی،ڈالر کی قدر میں کمی خطرناک حدوں کو چھو رہی ہے،کٹھ پتلی حکومت ہر شعبے میں ناکام ہوچکی،احتساب کو منطقی انجام تک پہنچاکر آئندہ الیکشن میں عمران خان جیسی دیانتدار قیادت کاانتخاب ملک کو مسائل کی دلدل سے نکالنے کا واحد راستہ ہے۔
دریں اثناء چئیرمین سیکرٹریٹ میں عبدالعلیم خان سے سابق وزیر اعلیٰ پنجاب میاں افضل حیات ، سیالکوٹ کی پی پی127سے ٹکٹ ہولڈر امجد علی باجوہ ،سینٹرل پنجاب لیگل افئیرز کے صدر مہر فیاض ،سرگودھا سے ملک عثمان اور گجرات سے مدد علی شاہ کی علیحدہ علیحدہ ملاقاتیں ہوئیں جن میں اہم سیاسی و پارٹی امو رپر مشاورت کی گئی عبدالعلیم خان نے پارٹی رہنماؤں سے کہا کہ وہ اپنے اضلاع کی سیاسی صورتحال پر نگاہ رکھیں اور آئندہ انتخابات کے حوالے سے ایسی حکمت عملی اختیار کریں جس سے پارٹی کا نام روشن ہو پی ٹی آئی کے مرکزی نائب صدر و ایم پی اے محمد شعیب صدیقی اور سینٹرل پنجاب کے جنرل سیکرٹری شوکت بھٹی بھی اس موقع پر موجود تھے۔

مزید پڑھیں۔  سلمان خان کی فلم ' لوراتری' کا ٹریلرجاری

Comments

comments

اپنا تبصرہ بھیجیں