شاہ سلمان کی دعوت پر دوبھارتی بہنوں کی ریاض کیمل میلے میں شرکت

ریاض:سعودی دارالحکومت ریاض جاری سالانہ کنگ عبدالعزیز کیمل فیسٹیول میں خصوصی دعوت پر دوبھارتی بہنوں نے شرکت کی اورریت کے فن پارے بنائے،عرب ٹی وی کے مطابق بھارتی لڑکی نیلو نے کہاکہ ہم کنگ عبدالعزیز کیمل فیسٹیول میں شرکت کے لیے بھارت سے آئے ہیں۔ ہمیں شرکت کی دعوت موصول ہونے پر بہت مسرّت ہوئی اور اب ہم مٹی اور ریت پر فن پارے تیار کرنے میں مصروف ہیں۔ ہم نے بہت سے مجسمے ماڈلز بنائے جن میں سعودی عرب کے نقشے پر ویڑن 2030 شامل ہے۔ اس کے علاوہ اونٹ کے رکھوالے کا باز اور شکرے کے ساتھ بھی مجسّماتی فن پارہ شامل ہے۔ اس منصوبے کے لیے ریت کے 14 ٹرک استعمال میں لائے گئے۔نیلو کے مطابق صحرائی منظر پیش کرنے کے لیے اونٹ پر رکھی جانے والی زین ، اْس پر قالین اور ان کے علاوہ اونٹوں کے رکھوالے کے کپڑے اور سر پر پہنا جانے والا عربی رومال الشماغ بھی فن پارے میں پیش کیا گیا۔ نیلو کے مطابق اْن دونوں کا سعودی عرب کا دورہ ان کے فنی کیرئر کا 60 واں منصوبہ ہے۔ دونوں بہنیں ریت سے تیار کردہ فن پاروں کا ایک میوزیم بنانے کی خواہش مند ہیں جہاں سعودی لوک ورثہ اپنی تمام تر شکلوں کے ساتھ موجود ہو۔