قومی ٹیم نے گزشتہ سال فائنل میں بھارت کو شکست دے کر چیمپئنز ٹرافی جیتی تھی
آئی سی سی نے سالانہ ایوارڈز کا اعلان کرتے ہوئے گزشتہ سال ہونے والی چیمپئنز ٹرافی میں پاکستان کی جیت کو مو منٹ آف دی ائیر جبکہ فاسٹ بالر حسن علی کو ایمرجنگ پلیئر آف دی ائیر قرار دیا ہے۔ چیمپئنز ٹرافی میں پاکستان نے فائنل میں روایتی حریف بھارت کو شکست دی تھی۔ آئی سی سی کے سالانہ ایوارڈز کا اعلان دبئی میں کیا گیاجس میں ایمرجنگ پلیئرآف دی ائیر کی کیٹیگری میں پاکستان کی جانب سے حسن علی اور شاداب خان کے علاوہ بھارتی اسپنر کلدیب یادیو اور انگلش بیٹسمین ڈیوڈ مالان کو بھی نامزد کیا گیا تھا، تاہم ایوارڈ آئی سی سی چیمپئنز ٹرافی میں 13 وکٹیں حاصل کرنے والے حسن علی کے حصے میں آیا۔
آئی سی سی کی طرف سے جاری کردہ ایوارڈ ز لسٹ کے مطابق آسٹریلوی کپتان اسٹون اسمتھ آئی سی سی ٹیسٹ کرکٹر آف دی ائیر قرار پائے ۔ انہوں نے 16 ٹیسٹ میچز میں 1875 رنز اسکورکئے۔
افغانستان کے اسپنر راشد خان ایسوسی ایٹ پلیئر آف دی ایئر قرار پائے ۔
اور امپائرنگ کے شعبے میں جنوبی افریقہ کے میرائس ایراسمس امپائر آف دی ائیر قرار پائے ٗ انہوں نے گزشتہ سال بھی بہترین امپائر کا اعزاز اپنے نام کیا تھا۔ (ذرائع این این آئی)
Discussion about this post