کوئٹہ: وزیر اعلیٰ بلوچستان میر عبدالقدوس بزنجونے کہا ہے کہ بلوچستان کے قدرتی و دیگر وسائل کو ترقی دے کر صوبے کو خود انحصاری کی راہ پر گامزن کیا جاسکتا ہے۔
ہم ماضی سے ہٹ کر بلوچستان کے وسائل کی ترقی کیلئے جامع پالیسی مرتب کرینگے اور بیرونی سرمایہ کاروں کے لئے راستے کھول کر سرمایہ کاری کو فروغ دینگے۔ ہماری تمام تر توجہ پائیدار امن کے قیام اور صوبے کے وسائل عوام کے مفاد میں بروئے کار لانے کی جانب مبذول رہے گی اور مختلف شعبوں میں بیرونی سرمایہ کاری کا خیر مقدم کیا جائیگا۔ ان خیالات کا اظہار انہوں نے چین کی سیمنٹ اور تعمیراتی کمپنی وی یے Weyeکے چیف ایگزیکٹو آفیسر ڈاکٹر ژی وی ژانگ(Dr. Yiwei Zhang)سے بات چیت کرتے ہوئے کیا
اور انہیں اپنی کمپنی کے بارے میں بریفینگ دیتے ہوئے بلوچستان میں تعمیراتی شعبہ میں سرمایہ کاری میں دلچسپی کا اظہار کیا۔
سابق صوبائی وزیر میر فائق علی جمالی، چیف سیکرٹری بلوچستان اورنگزیب حق، ایڈیشنل چیف سیکرٹری (ترقی و منصوبہ بندی) نصیب اللہ بازئی اور متعلقہ محکموں کے سیکرٹریز بھی موجود تھے۔
وزیر اعلیٰ نے چین پاکستان اقتصادی راہداری سمیت دیگر منصوبوں میں چین کے تعاون اور اشتراک کو خطے میں اقتصادی اور معاشی سرگرمیوں کے فروغ کی ایک نئی جہت قرار دیتے ہوئے کہا کہ ان منصوبوں بلخصوص سی پیک میں بلوچستان کوکلیدی اہمیت حاصل ہے ہم چاہتے ہیں کہ بلوچستان کے عوام اس عظیم منصوبے کے ثمرات سے جلد از جلد مستفیدہوں اس حوالے سے انہوں نے بتایا کہ سی پیک سے متعلق بلوچستان کے ترقیاتی منصوبوں پر کام کو تیز کیا جائے اور وہ خود اس کی نگرانی کریں گے۔
Discussion about this post