شہبازشریف ملز م کی گرفتاری کا کریڈٹ لینے کی بجائے گولی چلوانے کی ذمہ داری قبول کریں ‘عبدالعلیم خان

شہبازشریف ہر وقت تالیاں بجانا چاہتے ہیں جبکہ نا اہل نوازشریف انہیں وزیر اعظم بنانے کا جھانسہ دے رہے ہیں‘صدر تحریک انصاف سنٹرل پنجاب
لاہور: تحریک انصاف سنٹرل پنجاب کے صدر عبدالعلیم خان نے کہا ہے کہ قصور سانحہ میں پہلا قتل جرم اور باقی حکومتی غفلت کا نتیجہ ہیں اگر بر وقت حکومت اقدامات کرتی تو معصوم بچیوں کو بچایا جا سکتا تھا ،جاتی امراء کی چھت سے قصور شہر کی روشنیاں صاف نظر آتی ہیں لیکن اگر وزیر اعلیٰ اپنے ہمسائیوں سے بھی بے خبر ہیں تو راجن پور میں چھوٹو گینگ کیوں کر حکمرانی نہیں کرے گا؟اپنے ایک بیان میں انہوں نے کہاکہ (ن) لیگ نے اقتدار کے خاتمے پر نت نئے ڈرامے شروع کر رکھے ہیں شہباز شریف ملزم کی گرفتاری کا کریڈٹ لینے کی بجائے پر امن احتجاج کرنے والے شہریوں پر گولی چلانے والے پولیس اہلکاروں پر مقدمہ چلانے کا اعلان کرتے اور اپنی ذمہ داری قبول کرتے تو وہ انصاف کے زیادہ نزدیک ہوتا۔ عبدالعلیم خان نے کہا کہ نواز شہباز اپنے ہم عصروں میں سب سے زیادہ جھوٹے ہیں ترقی ترقی کی رٹ لگانے والوں کے اصل چہرے عوام کے سامنے ہیں کرپٹ ٹولے کو 2018ء میں نہ صرف عوام کو جواب دینا ہوگا بلکہ کچھ بعید نہیں کہ انہیں انتخابی حلقوں میں زبردست عوامی رد عمل کا سامنا بھی کرنا پڑے ۔انہوں نے کہا کہ صوبائی وزیر قانون نے من مرضی کا بیان دلوانے کیلئے معصوم زینب کے باپ کو وزیر اعلیٰ شہباز شریف کی موجودگی میں ہراساں کیا جس کا کلپ سوشل میڈیا پر وائرل ہو چکا ہے سیریل کلر حکومت کی غفلت اور نا کامی کا ثبو ت ہوتا ہے وزیر اعلیٰ کو بتایا جائے جرم کے بعد بننے والے قانون کا اطلاق متعلقہ مجرم پر نہیں ہوتا ۔عبدالعلیم خان نے کہا کہ مشرقی روایات کا درس دینے والوں نے مظلوم بچی کے باپ کو پوری قوم کے سامنے بٹھا کر تالیاں بجوائیں انہیں معلوم ہونا چاہیے تھا کہ ملزم کی گرفتاری پر ندامت سے سر جھکانا چاہیے تھا ۔انہوں نے کہا کہ شہبا زشریف نے اپنی تقریر کے دوران کہا کہ ان کے بس میں ہو تا تو ملزم کو چوراہے میں لٹکا دیتے جس سے یہ بات ثابت ہوتی ہے کہ جہاں ان کا بس چلتا ہے وہاں کسی کی جان لینے میں دریغ نہیں کرتے اور قصور واقعہ میں شہید ہونے والے عام شہری اس کا زندہ ثبو ت ہیں ۔عبدالعلیم خان نے مزید کہا کہ شہباز شریف ہر وقت تالیاں بجانے یا تالیاں سننے کے عادی ہو چکے ہیں جبکہ نا اہل اور کرپٹ سابق وزیر اعظم انہیں وزیر اعظم بنانے کا جھانسہ دے رہے ہیں۔