زیتون قدرت کا انمول تحفہ

عظیم حسین
زیتون اللہ کی طرف سے ایک نایاب تحفہ ہے۔ یہ کئی خصوصیات کا حامل ہے اور اس کا ذکر قرآن پاک میں بھی کیا گیا ہے۔ کھانوں میں استعمال ہونے کے ساتھ ساتھ اس میں بہت سی بیماریوں کا علاج بھی چھپا ہے۔ آیے آپ کو زیتون اور اس کے تیل کے چند مفید استعمالات کے بارے میں بتائیں۔

ناخنوں کے لئے زیتون کے تیل کا استعمال:

اگر آپ کے ناخنوں کے کیوٹیکلز خراب ہیں اور ناخن آسانی سے ٹوٹ جاتے ہیں تو اس کے لیے ایک کپ زیتون کا تیل لیں اور اپنی انگلیوں کو اس میں کچھ دیر کے لیے ڈوبا رہنے دیں۔ چند دن ایسا کرنے سے آپ کو واضح فرق محسوس ہوگا، نہ ہی ناخن ٹوٹیں گے اور ناخن کے اردگرد کی جلد بھی صاف اور چمکدار رہے گی۔

ہونٹوں پر زیتون کے تیل کا استعمال:

خشک اور پھٹے ہونٹ نہ صرف دیکھنے میں بُرے لگتے ہیں بلکہ بہت تکلیف کا باعث بھی بنتے ہیں۔
اِن سے چھٹکارا پانے کے لیے روز رات کو سونے سے پہلے ہونٹوں پر تھوڑا سا زیتون کا تیل لگائیں، اس سے ہونٹ نرم اور خوبصورت ہوں گے۔

بالوں پر زیتون کے تیل کا استعمال:

زیتون کے تیل کو سر کے بالوں کی جلد اور بالوں پر لگائیں اور بالوں پر پلاسٹک کی ٹوپی چڑھا لیں اور آدھے گھنٹے بعد شیمپو سے دھو لیں۔ اس سے بال مضبوط، خشکی سے پاک اور نرم و ملائم ہوں گے۔

باڈی سکرب اور میک اپ ریموور:

زیتون کے تیل کو میک اپ ریموور اور باڈی سکرب کے طور پر بھی استعمال کیا جاسکتا ہے۔ تیل کو ململ کے کپڑے پر لگا کر چہرے کے میک اپ کو با آسانی صاف کیا جاسکتا ہے۔ باڈی سکرب بنانے کے لیے ایک برتن میں مناسب مقدار میں زیتون کا تیل، نمک اور چینی ڈال کر اچھی طرح مکس کر لیں اور پھر جلد پر لگا کر مساج کر لیں۔ اس سے جلد نرم و ملائم ہوگی اور رنگت بھی بہتر ہوگی۔

چہرے کی جھُریاں اور پھٹی ایڑھیوں کا علاج:

چہرے کی جھُریوں اور ایڑھیوں و کہنیوں کی سیاہ رنگت کو ختم کرنے اور سخت جلد کو نرم کرنے کے لیے روز باقاعدگی سے زیتون کے تیل کا مساج کریں۔ تھوڑے دن کے استعمال سے ہی آپ کو نمایاں بہتری نظر آئے گی۔