وزیر اعلیٰ بلوچستان نے کلی اسماعیل میں کم عمر بچی کے قتل کے واقعہ کا سختی سے نوٹس لے لیا
وزیر اعلیٰ بلوچستان میر عبدالقدوس بزنجو نے کوئٹہ کے علاقے کلی اسماعیل میں کم عمر بچی کے قتل کے واقعہ کا سختی سے نوٹس لیتے ہوئے، آئی جی پولیس بلوچستان کو مقتول بچی کی طبی رپورٹ سمیت واقعہ کی تفصیلی رپورٹ پیش کرنے کا حکم دیا۔
اور واقعہ میں ملوث عناصر کی گرفتاری کے لئے تمام دستیاب وسائل برؤے کار لانے کا حکم دیا ہے۔ وزیر اعلیٰ بلوچستان جو گوادر کے دورے پر ہیں نے واقعہ کی خبر سنتے ہی ان کے ہمراہ موجود وزیرداخلہ میر سرفراز بگٹی اور آئی جی پولیس معظم جاہ انصاری کے ساتھ اجلاس منعقد کیا جس میں صوبائی وزیر عاصم کرد گیلو، صوبائی مشیر کہدہ بابر اور رکن صوبائی اسمبلی میر حمل کلمتی بھی شریک ہوئے۔
وزیر اعلیٰ بلوچستان کو آئی جی پولیس نے واقعہ کی رپورٹ اور تمام تفصیلات سے آگاہ کرتے ہوئے بتایا کہ وہ ڈی جی آئی کوئٹہ اور دیگر پولیس حکام کے ساتھ مسلسل رابطہ میں ہیں۔
پولیس ماہرین نے فوری طور پر کارروائی کا آغاز کرتے ہوئے شواہد اکھٹے کرنے اور بچی کے عزیز واقارب اور علاقے کے لوگوں سے معلومات کے حصول کا آغاز کردیا ہے اور بچی کی لاش کو طبی معائینہ کے لئے بھجوادیا گیا ہے۔
پولیس سرجن کی مصدقہ رپورٹ کی روشنی میں کاروائی کو آگے بڑھایا جائے گا۔ انہوں نے وزیر اعلیٰ بلوچستان کو یقین دلایا کہ واقعہ کی صحیح سمت میں تحقیقات کر کے اصل مجرم تک پہنچنے میں کوئی کسر اٹھا نہیں رکھی جائے گی
وزیر اعلیٰ بلوچستان نے مقتول بچی کے والدین سے تعزیت اور ہمدردی کا اطہار کرتے ہوئے مجرم کو قانون کے کٹہرے میں لاکر انہیں انصاف کی فراہمی کی یقین دہانی کرائی ہے۔ اور کہا کہ دکھ کی اس گھڑی میں ہم آپ کے ساتھ کھڑے ہیں اور مجرم کوسز ا دلانے تک چین نہیں لیں گے۔
Discussion about this post