فیروزخان کی مہندی کی تصاویرحمائمہ ملک نےسوشل میڈیا پر وائرل کردی

فیروز خان کی مہندی کی تقریب میں شوبز اور فیشن انڈسٹری کے متعدد فنکاروں کی شرکت

کراچی:  اداکارہ حمائمہ ملک نے اپنے چھوٹے بھائی اور پاکستان شوبز انڈسٹری کے نامور ماڈل و اداکار فیروز خان کی مہندی کی تصاویر شیئر کی ہیں۔

ڈرامہ سیریل خانی کے ذریعے مقبولیت حاصل کرنے والے اداکار فیروز خان رواں ماہ کے آخر میں شادی کے بندھن میں بندھ رہے ہیں جس کی تصدیق ان کی بہن اور پاکستان شوبز انڈسٹری کی نامور اداکارہ حمائمہ ملک نے خود کی تھی۔

گزشتہ روز فیروز خان کی مہندی اور ڈھولکی کی تقریب منعقد کی گئی جس میں شوبز اور فیشن انڈسٹری کے متعدد فنکاروں نے شرکت کی۔حمائمہ ملک نے ان خوشیوں بھرے لمحات کو اپنے اور فیروز خان کے چاہنے والوں کے ساتھ شیئر کیا۔

مہندی کی تقریب میں یاسر حسین، سونیا حسین، ایاز سومرو اور فیشن ڈیزائنر نومی انصاری پیش پیش رہے۔

واضح رہے کہ اس سے قبل حمائمہ ملک ایک انٹرویو میں کہہ چکی تھیں کہ ان کی بھابھی کا تعلق کراچی سے ہے تاہم وہ شوبز انڈسٹری سے تعلق نہیں رکھتیں۔