ڈائن قرار دے کر خاتون کا 4 بچوں سمیت قتل

بھو نیشور: بھارت میں ایک خاتون کو کالا جادو کرنے والی ڈائن قرار دے کر 4 بچوں سمیت بیدردی سے قتل کرنے والے 6 افراد کو گرفتار کرلیا گیا۔

بین الاقوامی خبر رساں ادارے کے مطابق بھارتی ریاست اڑیسہ میں 4 روز قبل ایک خاتون کو کالا جادو کرکے لوگوں کی جان لینے والی ڈائن قرار دے کر قتل کردیا گیا تھا۔ ملزمان نے مقتولہ کے 4 کم سن بچوں کو بھی موت کے گھاٹ اتار دیا تھا۔

پولیس نے کارروائی کرتے ہوئے قتل کے الزام میں 6 افراد کو حراست میں لے لیا ہے، قاتلوں کا تعلق خاتون کے ہی خاندان سے ہے۔ جنہوں نے ایک عامل کے کہنے پر قتل کی یہ لرزہ خیز واردات کی۔

پولیس کا کہنا ہے کہ کچھ عرصے قبل ملزمان کی بیٹی شدید علالت کے بعد انتقال کر گئی تھی، بیٹی کے انتقال پر اہل خانہ نے عامل سے رجوع کیا جس نے کم سن بیٹی کی موت کو کالا جادو قرار دیتے ہوئے بتایا کہ جادو خاندان میں سے کسی خاتون نے کیا ہے۔

درندہ صفت بیٹے نے ماں کو قتل کرکے خون پی لیا

ملزمان نے جعلی عامل کی تصدیق پر اپنے خاندان کی مذکورہ خاتون کو ڈائن قرار دیکر 4 کم سن بچوں سمیت قتل کرکے لاشیں گاﺅں کے نزدیک واقع کنویں میں پھینک دی تھیں۔