پنجاب اور خیبرپختون خوا سے آنے والے مسافروں کو روکا جائے، سندھ حکومت

کراچی: وزیر تعلیم سندھ سعید غنی نے کرونا کی صورتحال کے پیش نظر پنجاب اور خیبرپختون سے ہر طرح کا سفر بند کرنے کا مطالبہ کردیا۔

کراچی میں پریس کانفرنس کرتے ہوئے سعید غنی نے کہا کہ این سی او سی اجلاس میں اسکولوں کی بندش پر بات ہوئی تھی اور اسٹیئرنگ کمیٹی کی اکثریت نے اسکول بند کرنے کی رائے دی۔

انہوں نے کہا کہ کرونا صورتحال پر سندھ میں پنجاب اور خیبرپختون والے حالات نہیں، پنجاب اور کے پی سے بین الصوبائی ٹرانسپورٹ، ٹرین اور ہوائی سفر بند کیا جائے کیونکہ لوگ آتے جاتے رہیں گے تو وائرس لوگوں کو نقصان پہنچائے گا، صحیح اقدام نہیں کیے تو خدشہ ہے کہ سندھ میں بھی صورتحال خراب ہو سکتی ہے۔

بین الصوبائی ٹرانسپورٹ ہفتے میں دو دن بند رکھنے کا فیصلہ

سعید غنی کا کہنا تھا کہ اسکول بند ہونے سے بچوں کی تعلیم اور ایجوکیشن سیکٹر پر اثر پڑے گا، کورونا صورتحال میں بچوں کی تعلیم کا نقصان ہوا ہے، امید ہے پرائیویٹ اسکول حکومت سندھ کی مجبوری کو سمجھیں گے، حکومت سمیت کوئی نہیں چاہتا کہ تعلیمی نقصان ہو۔

صوبائی وزیر تعلیم نے مزید کہا یہ بات واضح ہے کہ اس سال بغیر امتحان پاس نہیں کیا جائے گا اور طلبہ کو بغیر امتحان لیے اگلی کلاس میں نہیں بھیجیں گے، امتحانات آگے بڑھانے پڑے تو بڑھائیں گے لیکن امتحان ضرور ہوگا۔

Leave a Reply