‘اس حکومت کی نالائقی کی وجہ سے 40 روز میں روپیہ 20 روپے تک کمزور ہوا ہے’

پاکستان تحریک انصاف (پی ٹی آئی) کے رہنما و سابق وزیر خزانہ سینیٹر شوکت ترین نے دعویٰ کیا ہے کہ پیٹرولیم کمپنیاں ڈیزل پر 70 اور پیٹرول پر 50 روپے فی لیٹر کمائی کر رہی ہیں۔

رانا ثناءاللہ نے ملک میں بدمعاشی مچا رکھی ہے: شیخ رشید

اسلام آباد میں پریس کانفرنس کرتے ہوئے شوکت ترین کا کہنا تھاکہ حکومت سے باہر ہوتے ہوئے ایک روپیہ بڑھانے پر یہ کہتے تھے مہنگائی کا طوفان آ جائے گا لیکن اب پیٹرول اور ڈیزل میں ایک ہفتے میں 60 روپے فی لیٹر اضافہ ہو گیا۔

انہوں نے کہا کہ ہم تو آئی ایم ایف سے آٹھ ماہ تک لڑے، پیٹرول و ڈیزل کی قیمتیں فکس کیں اوربجلی کی قیمتوں میں کمی کی لیکن اب نالائق اور گھبرائی ہوئی حکومت آ گئی ہے۔

شوکت ترین نے بتایا کہ پلاننگ کر رکھی تھی کہ روس سے سستا تیل لیں گے، ایسا نہیں تھا کہ عوام پر 60 روپے بڑھا کر ایٹم بم پھینک دیں، یہ روس کے پاس نہیں جاتے  تو روس کیا خود پیٹرول گھر چھوڑنے آئے گا؟

سابق وزیرخزانہ نے دعویٰ کیا کہ پیٹرولیم کمپنیاں ڈیزل پر 70 اور پیٹرول پر 50 روپے فی لیٹر کمائی کر رہی ہیں۔

انہوں نے کہا کہ ٹارگیٹڈ سبسڈی دینے کے بجائے سب شہریوں پر اس حکومت نے تیل کی قیمتوں کا بوجھ ڈالا۔

سابق وفاقی وزیر حماد اظہر نے کہاکہ مفتاح اسماعیل کو علم نہیں کہ روس پر کوئی پابندی نہیں، اس حکومت کی نالائقی کی وجہ سے 40 روز میں روپیہ 20 روپے تک کمزور ہوا ہے، مفتاح اسماعیل 16 روپے یونٹ سے اب 24 روپے تک فی یونٹ مہنگا کرنے لگے ہیں۔

خیال رہے کہ ملک میں گزشتہ ایک ہفتے میں پیٹرولیم مصنوعات کی قیمتوں میں 60 روپے فی لیٹر اضافہ ہوا ہے۔